下午茶時間的末段，位於上環大馬路旁的茶餐廳，倘大的鋪位，只有兩三成客，人客分佈在各角落，各佔一枱成一國。 自然區間出的社交距離，這是沒有疫情也會出現的情況。
人客四散，集中的返而是門口的店小二們。 企堂行來行去的有二人，年齡是乘風破浪的姐姐級；開放式廚房裡，麵檔坐著一嬸嬸，旁邊是水吧，有一阿叔。
一進門，坐下來，已聽到麵檔嬸在說這幾天的見聞，相信是她上班時的親身經歷。
麵檔嬸：「好多人呀，不過過海真係好快，我數過十幾個站就到羅湖...... 會展，紅磡，旺角...... 係旺角東，九龍塘.......」
破浪姐甲：「你講係金鐘？ 條電梯好長呀？」
麵檔嬸：「...... 大埔...... 係呀條電梯好長，我都驚坐佢。 有三條都好長，西灣河，時代廣場...... 」
破浪姐乙：「時代廣場？ 你講朗豪坊吓話。」
麵檔嬸：「係呀！ 朗豪坊。 有三條都好長好直，西灣河，朗豪坊，金鐘。 坐都有啲驚。 不過真係好快......」
門外進人。
門外客：「豬排蛋飯，唔要豉油，凍檸茶少甜。」
破浪姐甲向水吧叔喊道：「豬排蛋飯，走色，涼茶少甜。」 ，再問門外客：「唔要豉油可？」
門外客點頭。
破浪姐甲：「記得走色。」
破浪姐乙在望手機。
破浪姐乙：「嘩！ 筲箕灣有兩個女學生跳左樓呀！」
破浪姐甲：「吓？ 無啦啦做咩跳呀？ 聽到都打冷震。」
破浪姐乙：「感情？ 同性戀？ 成績？ 我估家咋。 我冇入去睇，我睇題目咋。」
破浪姐甲：「其實跳樓都要好大勇氣，跨出果步。 我就唔敢啦。」
破浪姐乙：「有勇氣跳，點解冇勇氣生存落去？ 唉，唔明。」
門外有一肥佬經過。
麵檔嬸向水吧叔叫嚷：「喂，老闆！ 你同鄉呀！ 門口呀！」
水吧阿叔一望：「都係潮聯既。 佢汕頭，我岸豐，都唔同鄉下。」
另一門外客經過。 在門外與破浪姐甲說了幾句便走。
破浪姐甲進門對麵檔嬸說：「英姐話對面惠康有個榴槤剛爆口，叫你去買。」
麵檔嬸：「咩話？」
破浪姐甲：「英姐呀！你老友。 叫你去惠康睇下個榴槤呀。」
破浪姐乙：「我上次係惠康買左邊榴槤，都唔熟，食到第三日先爆開。」
麵檔嬸：「爆開係好食啲既。」
水吧阿叔：「你仲唔去？ 話唔定唔洗錢。」
麵檔嬸問破浪姐甲：「邊個話？」
破浪姐甲：「阿英呀！」
於是麵檔嬸就急急腳走出門，向對面街出發。
******
 |
| 今天食到的下午茶餐，也是豬排蛋飯 |
狀況是冇造型，成碟飯散哂咁。 但一邊聽著店小二們的對話，畢起沾有甜豉油的白飯，嗒落又好似幾好味。
大師兄，你返來了？
Comments